29
July
2022
/
Автор: Валдо
/
Истории
Язык

Кить истят эрзят ды мезе истямо Эрзянь Мастор

«ФЕМИНИСТСКИЕ ТРАНСЛОКАЛЬНОСТИ» ДЫ «БЕДА» ПЕНЗЫ, КОДА ЭРЗЯНЬ МАСТОР РИЗКС КИРДЕЗЬ РОССИЯНЬ ИМПЕРИЯНТЬ ДЫ ССРВ-НТЬ АЛО ДЫ КОДА ЭРЗЯТНЕНЬ ПУТОМАСТ ДЫ СНАРТНЕМАСТ НЕЙ.

«Феминистские транслокальности» ды «Беда» пензы, кода эрзянь мастор ризкс кирдезь россиянь империянть ды ссрв-нть ало ды кода эрзятнень путомаст ды снартнемаст ней.

Колонизациянь этникань аспектось

Эрзя — Равонь суоми-угортнэнь эйстэ вейке раскесь. Эрзятнень атяст-сэрдяст тёжат иетнень перть эрильть те таркасонть, масторонстэнь эно, косо сынь эрильть ды эрить неень шкастокак, мерить Эрзянь Мастор. XI–XIII пингтнестэ Эрзянь Масторосо вачкавсь эсест кирдивиень кой. Цикань сёрмадовкстнэнь эйстэ содави эрзятнень Инязорост лемезэ — Пургаз. Пелеве ёндо Эрзянь Мастор пирязель Равонь ды Окань чиретнесэ, чилисемань ёндо — Окань чиресэнть, чивалгомань ёндо — Сурань чилисемань чиресэнть, лембе ёндо — куншкань ды алце Ёв леень чиресэ[1]. Куншкань пингстэ (Европань терминтнэнь тевс нолдамсто) эрзянь этникань седеесь ульнесь Алоошонь ёнкссонть, тосольть покш эрзянь ошт, невтемга, Арзамасонь ды Саровонь таркасост (сеть леметь эрзяньть). Ансяк цикань эцеманть пингстэ эрзятнень пельксэст оргодсь лембе ёнов, пельксэст истожавсь, пельксэст цикиявтозь. Секс течи эрзятнень этникань седеест ашти Мордовиянь Республиканть ёнкссо.

(арт.1) Эрзянь авась кодазь карксонть. Таркась: Борискина веле, Бугульмань буе, Самара ёнкс
криштявтыця Армас Отто Вяйсянен

Нусманя, секе марто редявикс иекс Эрзянь Масторонь туртов ваннови 1184 иесь. Ёвтави, те колонизациянть ушодоманзо шкась. 1184 иестэ ёвтавсь васня ёвтамось Владимир-Суздалень князень ломанензэ Эрзянь Масторов эцемась. Се шкасто сон “нолдазь лишметнень” эрзятнень лангс. Вана Владимиро-Суздалень князьчись, кона лангсо теевсь Московонь князьчись ды Россиясь, уставсь Эрзянь Масторонь колонизациянть. 1221 иестэ экспансиянь форпостокс путовсь Алоош. Эрзятнень, циятненькак улить кулят эрзянь ошонть ланга, конась ульнесь та-косо се ёнкссонть. Улиндеряволь алкукс, сонзэ каладыль Владимир-Суздалень князьчись.

1226 иестэ Лаврентьевань иесёрмалемасонть улить седе пензавтозь содамочитне: се шканя князень ломанензэ янгакшнозь Эрзянь Масторонть ды ламо эрзятнень саизь урекс. 1227 иестэ князь Юрий янгазь эрзятнень кудост ды телень кошост. 1228 иестэ Юрий ушмо марто совась Эрзянь Масторонтень, эрзятнень урекс кундамсто, ракшатнень, паксятнень ды апак сёпо ломантнень истожамсто. Седе мейле Юриянь ушмозо пельксэсь тусь вирев. Тосо эрзятне куродызь сонзэ ды тапась. 1229 иестэ инязор Пургаз ветилизь ушмонть Алоошов. Се шкане сон Кремленть эзь сае, ды эрзят пултазь кудотнень ошонть вакска ды Пежтеме Пазонь Чачтыцянть монастыренть. 1232 иестэ Владимирань князесь таго кучозь ломанензэ, конат пултазь эрзянь велетнень ды куловтозь эрзятнень (иесёрмалемась ёвты: “ламо мордватнень чавинек”).

Мон арсян, сетне факттнэ невтить: Эрзянь Масторонь нельгемась XII–XIII пингтнестэкак од эрицянь колониализмань логиканть ёнов моли. Колониализманть истя чачосонть пек ламо од эрицят арсить саемс юронь раськенть масторост, ды окойники сеть мастортнэнь лангсо теевить ламочикс ды снартнить нардамс юронь эрицятнень (лия пайманть вельде: истожамонть эйстэ нарьги ассимиляциянть эйс). Владимирань князьчись тейсь вана сень. Князьтне озасть эрямс масторсо, косо эрзятнень каня чавозь ломанензэ, каня нельгезь тиринь масторонть эйстэ урекс.

Колонизациянть сыця эскельксэзэ ушодсь, зярдо Казямо Иван кирдеманзо пингстэ Казань ошонть нельгемадо мейле Эрзянь Мастор оккупировазь Московонь царьчисэнть. Седе тов эрзят саизь пельксэнть ламо прякепедематнесэ цикань кирдивиенть каршо. Саемга, Разинень Степанонь прякепедеманть пингстэ вейке эрзянь ветицятнень эйстэ ульнесь мурзась Боляень Акай. Ломатнень ламоксчись, конат тюресть эсензэ ушмосонть царень кирдивиенть каршо, лиясто 15 тёжатненень сакшнось. Секе марто, 1670 иестэ Акай кундазель ды чавозель нилекс печкезь[2].

Чалгавксось, конась теевсь эрзятнень экономикань, ломанькуронь, пазонь кемемань эрямос. Прякепедемат

Эрзят марто ды оляксчинть велявтомс мелест марто тюреманть туртов истожильть велеть какшонек-сыренек (невтемакс, Мотызлей, Миевлей, Ошпире велеть) ды цикат масторост лангсо кармасть эрямо. Масторось Вознесенэнь ды Дивеевань районтнень таркасонть допрок чавокс теезь: ундоксонь эрзят арасть (улить аволь умок сазь эрзят). Секе башка, эрзятненень кардасть кунцемс ракшатнень, гизаень тевтнень теемс ды леднемапелень кирдемс. Цикань нельгицят саезь ды соказь эрзянь паксятнень, истяяк кармавтозь эрзятнень туемс вирев[3]. Лиясто ундоксонь раськенть каршо нельгезь мастортнесэ вачкавсть виемемат, эрзятне иляст велявто кудов.

Колонизациясь кандсь полавтнемат эрзянь ломанькуроненьгак. Эрзятнень этнографиянть классикесь В.Н. Майнов сёрмадсь: цикиявтомась снартнесь вийсэ максомс эрзятненень патриархалень ёнкстнэнь. Истя теевсь кудонь нарьгамось, конань нолдыть тевс “чумонь пандовксокс”. Эрзятне колонизациядо икеле, кода неяви, эзитькак сае пряс, кода те маштови. Цикань фольклордо башка, эрзянь фольклорсо истят сценат арасть. XIX пингенть песэ эрзят лемдекшнесть нарьгамонть тевс нолдамонть эсь кудораськенстэнь “цикань коекс”.

(арт.2) Эрзянь урьвакстомась пазидань вардамодо икеле. Таркась: Середневка веле (неень шкань Трифоновка веле), Бугурусланонь буе, Самара ёнкс
криштявтыця Армас Отто Вяйсянен

Колонизаторт снартнесть эрзятнень христианизировамскак. 1629 иестэ пансизь ды кардызь Раськень Озксонть. Керязьть пежтеме виреть, косо эрзят тейсть озномаст, ды чувтотнестэ вачкавсть ортодоксонь храмт — практикась, конась ульнесь таркань экологияс эцемакскак.

Секе шканя эрзятне снартнесть молемс чекавтомантень каршо ды кепедсть пряст. Вейке эйстэст, Терюшань прякепедемась, ушодсь 1743 иестэ, зярдо епископось эрзянь пазонь кемема марто тюреманть туртов пултазь эрзянь калмазыренть. Седе мейле эрзят урандесть епископонть лангс ды эль эзизь чаво. Сестэ кирдивийтне ушодсть се прякепедеманть тапамо. Казямочись, кона марто сынь тапазь прякепедеманть (невтемакс, кувать ды виевстэ дуцясть пекиязь аванть локшосо), седе пек кежиявтозь эрзятнень, ды прякепедемась кирвастсь од вийсэ. Сон прядовсь прякепедицятнень тапамосо царень ушмотне марто тортингесэнть. Эрзятне ёмавтозь 74 ломанть чавозекс[4].

Россиянь империясонть Виленонь ёнкссо вейкесь цикиявтыцятнень эйстэ весть ёвтась: “Мень эзь прядокшно цикань штык, сень прядсызь цикань школа ды цикань поп”. Мон арсян, те ёвтамось видесь Россиянь ламо колонязь раськетненень. Од эрицятнень колониализмаст ёнавкстнэнь коряс — полавтомс ды нардамс ундоксонь эрицятнень — “цикань штык” чавсь эли кравтозь мастортнэнь эйстэ эрзятнень, “цикань школа” ды “цикань поп” снартнезь цикиявтоманть вельде, культурань, келень, пазонь кемемань идентичист вельде эрзятнень ассимилировамс.

СССР пингетнеде ды “мордва” экзоэтнонимде

Цикиявтомань политикась эзь лотксеве XX пингстэкак. СССР, мельтопавттнэнь (праватнэнь) вейкетьксчинть лангс ды колониализмань политиканть ушонь сялдоманть лангс апак ванно, алкукс седе тов теизь колониалень политиканть аволь цикань ошэрицятнень (граждантнэнь) коряс ды онкстявтозь мастортнэнь коряс, седе башка эзь шнакшно раськень пря чарькодевтема. Невтемакс, документтнэсэ ды ломань сёрмадстоматнесэ тевс эзь нолдаво “эрзя” этнониманть, ансяк “мордва” экзоэтнониманть.

Эряви манейгавтомс: мордва — те аволь ансяк экзоэтнонимась, конань тевс нолдыть цикань кельсэнть. Те кавто лия раськетнень — эрзятнень ды мокшотнень ве лемсэ вейсэндявксось. Россиянь империясь, СССР, РФ снартнесть вийсэ вейсэндямс ве раськес кавто раськетнень лия келест, культураст ды историяст марто. Лиясто, башка историянь коряс, те прави пейдевтицякс. Невтемакс, XIII пингстэ эрзят ды мокшот тюрекшнесть вейке омбоценть каршо, ды сеть теематнень сёрмалемась россиянь вановкссонть вейсэндязь “мордва” марто неяви теке мемесь Шанжав-ломань марто.

(арт.3). Эрзянь ава Проска коень-кирдань оршамопельтнесэ. Таркась: Шентала веле, Бугульмань буе, Самара ёнкс
криштявтыця Армас Отто Вяйсянен
1914

Лия башка эрзянь идентичинь истожамонть снартнеманть невтемась: эрзянь валморотнень леметь “эрзя” ды “Эрзянь Мастор”, конатнень тевс нолдыть поладыцят, ютавтовольть цикакс кода “мордва” ды “Мордовский край”. Истя эрзят ды мокшот эсь пряст “мордвакс” алкукс зярдояк эзизь лемдекшне, видьстэ те ёвтави весе вийсэ цикиявтомадо икелень шканть ланга. Натой пек цикиязь куротнесэ, косо ломанть алкукс тевс нолдыть “мордва” валонть, сынь явовтыть мокшотнень ды эрзятнень, ды эрзятнень ули чарькодемаст: вана сынь мокшот, сынь лият, ды сынь аштить эйстенек башка (этникань идентичинть чарькодеманть паро смустьсэнть). Весть монень савкшнось марямс малав истя кортамонть цика ды эрзя ютксо:

— Сынь мордовкат, мон аздан, кода муемс ве кель мартост!

— Тонськак мордвинось!

— Истя, ансяк сынь мокшот!

Седе башка, пря чарькодевтема марто тюрязь, зярдо Мордвань АССР теемстэ эрзятнень ды мокшотнень пельксэст путсть вий “алонь ёндо” республикань теемасонть, те сялдоволь ды кардаволь “Мордовиянь автономистань бюронь тевсэ”. Шкадо мейле фабрикасть “Мордовонь блок тевеськак”, конань коряс 1938 иень панжиковонь 23-24-це чистэ леднезельть 70 ломанть эрзянь ды мокшонь интеллигенциянть, культурань ды нациянь теицятнень ютксто. Леднезь ютксо се тевенть коряс — кельсодыцясь Рябовонь Анатолий, кона теезь литературань норманть эрзянь келенть туртов (сонзэ тонавтницянзокак репрессировазельтькак), Тимофей Васильев юристэсь, “Эрзянь коммуна” кулялопань витницясь К.Д. Звездин, “Сятко” журналонть витницясь Д.И.Гребенцов. Эрзянь культуранть ды кирдивиень коень вельмеманть ветиця теицянзокак репрессировазельть. Истят этникань ёнов молиця тевтне националистэнь организациятнень шкинеманть коряс валгстовсть верьксстэнть лия Равонь республикатнескак[5].

Националень интеллигенциянть истожамодо башка, урандесть эрзянь кельскак. Невтемакс, эрзянь лингвисттнэнь пельде максозь терминтнэнь таркас, конатнэнь улить кезэрэнь юронзо, норматнень коряс вийсэ максозельть ламо саень валт цикань келенть эйстэ. Истя, вейке Мордовиянь АССР ЦИК Президиуманть мельспутомасонзо кармавтозь полавтнемс “тешкс” терминэнть “знак” терминэнть таркас, “калгодо тешкс” — “твёрдый знак” таркас, “пшкадема” — “обращения” таркас. Эрзянь кельсодыцятнень важодемась эно антисоветэнекс мерекшнезь[6].

СССР-со историкатнень эрявкшнось кикстамс цикань раськенть пельксэнзэ прогрессивноекс, конась канды валдо “перьгедезь” раськетненень. Невтемакс, советэнь шканть эйстэ Россиянь этнографиянь музеень экспозициясонть, конась алтазь Равонь ды Уралонь раськетнень, конатнень ютксо улить эрзяткак, лазынесэнть ёвтыть прогрессивонь, ветиця цикань раськенть пельксэденть лия этностнэнь историясонть.

Неень шкань Россиясонть эрзятнень эрямост

Цикань раськенть ветиця пельксэденть тезисось лиякстомсь, ансяк нама эзь ёма. Течи цикатнэ чарькодевить раськекс, коната машты тевс нолдамо лия раськетнень эсь мелензэ коряс. Истя ёндо варштыть Мордовия Республиканть кирдивиензэ, невтемакс, ютазь прявтозо Николай Меркушкин. “Ули цикань раськесь, кона течи доминицясь те масторсонть, овсе масторонь теицясь” — сон ёвтась[7]. Истя юткоёжот раськетнесэ кастовить кирдивиень вийсэ, коень нолдамонь вельдеяк. 2020 иестэ конституцияв витневкстнэнь путоманть пингстэ келей публикань туртов те, кода неяви, кадовсь пек апак редя ды покш смусь а кандыцякс, ансяк ундоксонь раськеть невтицяст ды активиксттнэ седе пек ледстнить парсте: цикань келенть лемдизь “масторонь теиця раськенть” келекс Россиянь Лувонь койсэ.

(арт. 4) Эрзянь од авань морамокужось. Таркась: Шентала веле, Бугульмань буе, Самара ёнкс
криштявтыця Армас Отто Вяйсянен

1914

Те юткоёжось ломатнененьгак пачкодсь, секс сынь виздить эсь пряст, ацикаксчидест. Лиясто эрзятне арсить, келя эрзянь кель ульцянь кортамотнесэ а меревиксэсь. Эрзят, конатнень кедьстэ нельгесть эсь прянть мельванноманть, кортыть цикакс, тонавтнить эйкакштнэнь ансяк цикакс ды снартнить кандомо ваксарокс цикаксчинть. Сынь аравтыть эсь пряст нетнень каршо, конат колониалень иерархиянть коряс улить цикань идеалонть эйстэ седе васоло ды невтить абунгавтовикс активчи расизмасонть. Ёвтыть, келя “Машанок мирдезэ — аволь цикась!” ды пансесызь кудостост.

Секе шканя, зярдо эрзянь цёра цикань кель тонавкссонть тейсы ильведевкстнэнь, конат кортыцят коень коряс теить (сон цикакс кортыцясь, эрзянь келенть эно чачтыцянзо тензэ эзизь максо), цикань тонавтницясь яволявты: те тееви, секс мекс сон “мордвин”. Ды нококсни: эрзят авольть пек превейть ды а маштыть сакшномс ломанекс. Се ёвтамось сень ланга, мезень сёрмалесь Хоми Баба эсензэ мимикриянь концепциясонзо: колонизаторось снартни теемс колонизовазень эсензэ кондямокс, ансяк аволь педе пес, “ашо” ды “аволь ашо” юткова пирявксонть кирдезь. Се шкасто, зярдо Россиясонть расизмань ёнксонстэнь эряви башка ванкшномась, муеви аналогиясь “цика” ды “аволь цика” марто.

Секе шканя моли седе тов раськень эсь прянь чарькодеманть тапамонь политика. 1992 иестэ I Весероссиянь мордовонь раськенть промкссонть, конанть ветямонзо инициировазь эрзянь курось “Масторава”, эрзятне вешнесть “эрзя” эсь лем тевс нолдамодонть, ансяк се вешнемась эзь топавтово. Седе башка, 1995 иестэ I эрзянь раськенть Инекужосонть, конань теезь Малов Александр, Девяткин Валентин ды Маризь Кемаль, саезь эрзянь раськенть алкуксонь лемензэ коряс Мельяволявтома, конань эйсэ эрзятне пшкалесть кирдивиентень, явозь мелест саевемс масторлангонь раськетнень куросо эсь лемест марто[8]. Те пшкалеманть коряскак кодаяк мель эзь яво. 2012 иестэ Боляень Сыресь ды Эрюш Вежай пикетезь VI суоми-угоронь весемасторонь инекужонть. Пикетэнь тувталозо — башка эрзянь делегациянть Инекужов анолдамось россиянь кирдивиенть пельде лепштямонзо кувалт[9].

Эрзянь раськень айгема РФ-со пансеви. Невтемакс, 2007 иестэ Мордовиянь Республикань прокуратурась уставизь процессонть А.П. Рябовонь лемсэ эрзянь келень идема Лезэпарго аорев эрзянь кулялопанзо “Эрзянь Мастор” каршо. Кулялопанть лангсо каявкшнось чумось экстремизмасо, раськеютконь явомань кирвастнемасонть. Сялдомат-пансемат прядовсть седе мейле, зярдо Верце суд яла теке эзь муе материалтнесэнзэ мезеяк экстремистань. Се шканя кулялопа ванстовозь, ансяк 2009-це иестэ таштамковонь 25-це чистэ, зярдо эрзятнень пельде кочказь инязор Кшуманцянь Пиргуж суоми-угоронь раськетнень IV Промкссонть сравтозь “Эрзянь Мастор” кулялопанть, милициясь снартнесь мешамо. Инязорось чарькодевтсь, кулялопась официаленьстэ регистразь ды эйсэнзэ мезеяк кардазь арась. Секе чистэ инцидентась маштсь. Ансяк таштамковонь 26-це чистэ, зярдо Кшуманцянь Пиргуж таго сравтозь кулялопанть, сонзэ кундызь. Инязоронть эзить нолдакшно промксонть прядовомадонзо икеле, натой зярдо сонзэ марто лиссь гипертоникань криз. Криз шумбрачинть пек серьстяви, секс бути се лисеви, эряви госпитализировамс. Милициясь нолдазь лецицятнень тензэ, ансяк госпитализировамс эзть мере[10].

2015 иестэ таго ульнесь варчавксось пекстамс “Эрзянь Мастор” кулялопанть, се шкасто Роскомнадзоронть пельде. Сестэ РФ-онь Верце суд чиремтезь се вешеманть[11]. Ансяк 2020 иестэ эрзянь келень идемань Лезэпаргонть эйстэ пансевсть Нуянь Видяз, конась регистрировазь 1995 иестэ Лезэпаргонть ды конась ульнесь “Эрзянь Мастор”[12] кулялопанть прявт витницякс, ды Кшуманцянь Пиргуж. Лезэпаргось одс лемдезь Мордовиянь республикань ломанькуронь эрзянь келень ванстомань ды кастомань лезэпаргокс. Тувталокс аштесь: од лезэпаргонь азоронзо мелест коряс икелень лемесь ульнесь “агрессивань”[13].

Кирдивиенть ало Мордовиянь Республикань прессасонть ветяви активонь пропагандистань кампаниясь эрзянь раське айгемань теицятнень каршо, саемга, Кшуманцянь Пиргужонь каршо ды кочказь 2019 иестэ од инязоронть Боляень Сыресень каршо. Мусколиця мельполадкстнэ истят материалтнесэ токавтыть эрзянь теицятненьгак.

Седе башка, Россиянь кирдивийтне аволь весть снартнесть коламс вельмевтезь Раськень Озкс, невтемакс, сынь кундазь Кшуманцянь Пиргужонть, Озксонть Вельмевтеманть мелень кастыцянть, вейкенть сонзэ теицянзо ютксто, снартнезь полавтнемс эрзянь озксонть цикань кельсэ моротнекс ды поп-музыкакс.

Эрзянь келенть путоманзо аволь седе парсте. ООН классификациянть коряс эрзянь кель — ёмавтомань ало кель, эйкакштнэ сонзэ тиринекс а тонавтнить. Эрзянь келенть тевс нолдамонь сферась пек вишкалгавтозь. Мордовия Республикань эйкакшонь кужотнесэ кортамось эйкакштнэнь марто тееви цикакс, эрзянь келенть ланга кортыть ансяк 3–4% эйкакштнестэ. Республикань буеньтешксэнть томбале сеяк мик арась. Школатнесэ аволь ансяк кармавтозь тонавтнеманть кис шкась арась, лиясто кинигаткак арасть. Од эрзянь кинигатнень муемась, седеяк пек лепштязь, лиясто лиси мельстуиця прява печтемась: натой Саран ошонь кинигань микшнемакудосонть, косо микшневить нолдавкстнэ эрзянь кельсэ, лиясто а муевить классикань поладомат ды валксстнэ. Вейкине эйкакшонь журналось “Чилисема” ловныцятнень ламоксчист нурькалгадоманть эйстэ ашти пекстамо серстямонть ало. Цикань кель доминирави натой истя пелькссэнть, кода эрзянь велеть лемест. Ламо эйстэст кандыть цикань леметь. Полавтомгаст тозонь эрицятненень эряви путомс пек ламо вий. Истя эрзянь леметь пельксэст аламонь-аламонь туить.

(илл. 5) Эрзянская женщина, молодуха (Танька, Ta'nka) в воскресных одеждах. Место: Середневка (ныне Трифоновка), Бугурусланский район, Самарская область

фотограф Армас Отто Вяйсянен

1914

Оштё вейке россиянь колониализмань паймась - ундоксонь раськеть историяст синтремась эли чатьмонемась. Саран ошонь куншкасонзо ашти ошкужось, кона алтазь “мордвань ды цикань раськетнень вейсэндямост тёжа иетнень”, конань ало чарькодеви вейсэндямось славянтнэнь марто (цикатнень атяст-сэрдяст марто) ды икелепелень Россиянь кирдивиенть марто[14]. Те секень марто: кавксосядт иетнеде икеле эрзятнень куловтозь ды урекс тейнесь секе виесь.

Оштё вейке невтемась: куш XVIII пингстэ Саровонь пустынень теицясь Иоанн ёвтась: паряк, эрзянь ошось аштесь се таркасонть, кияк россиянь содыдейтнень эйстэ седе эзь мерекшне. Бульчум, мелест коряс, эрзянь культурась ульнесь алойшть мельгаст. Ансяк 1990-це иетнесэ эрзянь ошонть улеманзо кемекставсь, ансяк стакасто ды аволь сеске.

Весе сеть россиянь колониализмань политикаст ветить эрзятнень ламоксчист куроконь вишкалгадомантень. 2002 иеде 2010 иес эрзятнень ды мокшотнень ламоксчист вишкалгадсь малав 100 тёжат ломантнес. Боляень Сыресень мелензэ коряс, Россиясь теи ундоксонь раськетнень этноциданть. Седе сон ёвтась эсензэ кортамосонзо РВО-сонть (Раськень Вейсэндязь Организациясонть). Те  кортамось кармась васенцекс РВО-сонть эрзянь кельсэ. Улевиксчинть максозь Украинань Делегациясь[15].

Солидариксчись Украинань марто

Боляень Сыресь эри Украинасонть. Раськень идентичинть актуализациянтень тулкадемакс тензэ кармась Черноволонь Вячеславонь марто вастовомась, конась кортась мартонзо, зярдо сон 90-це иетнесэ ванстыль “националисттнэнь эйстэ” плакатонть “Володимире Іллічу, прости нас!” Ленинонь кеврунгонзо вакссо. Боляень Сыресентень вечкевсь: Черноволонь Вячеслав, конась пек кувать пекстазель Мордовиянь лагерьтнесэ, содась эрзятнеде Сыресьте седе ламо. Украинав Россиянь весе вийсэ эцемадо ды Киевень лангс урандемадо мейле инязор сась Территориалень ванстомантень. Лия эсь мелест коряс Украинань ванстыця эрзятнеде Инязорось корты: пек аламо, эрзянь националень вейсэндямонть теемга[16]. Ансяк ёвтави секе марто, пельксэсь раськень айгемасто ашти Россиянь агрессиянть каршо. 2014 иестэ Инекужонь эрзянь раськень топавтыця комитетэсь пшкадсь эрзятнень тортингев кучомань амеремадонть[17]. 2022 иестэ эно инязорось Киевсто пшкадсь эрзятненень туемс ульцяв ды лоткавтомс тортингенть[18].

[1] Зеленеев Ю. А., Зеленцова О. В. Средневековая мордва по археологическим данным // Поволжская археология. 2012. № 1.

[2] Абрамов В. К. Акай Боляев и Крестьянская война 1670–1671 гг. в Мордовском крае // Финно-угорский мир. 2020. № 2.

[3] Сычев А. А. Культ леса в системе экологических верований мордвы // Финно-угорский мир. 2015. № 4 (25).

[4] Титов А. А. Терюшевский бунт // Русское обозрение. 1893. № 8–10.

[5] Тязин Е. Н. Т. В. Васильев. Незабытый сын мордовского народа // Социально-политические науки. 2012. № 3.

Мартышкин В. Н. Васильев Тимофей Васильевич — патриот, правовед (о первом юристе-международнике в Великобритании) // Евразийская адвокатура. 2013. № 1 (2).

[6] Мосин М. В., Шеянова Т. М. Из истории создания терминологии в мордовских языках // Регионология . 2012. № 4 (81).

[7] https://er.ru/activity/news/v-mordovii-nachinaetsya-prazdnovanie-1000-letiya-edineniya-s-narodami-rossii?

[8] http://erzan.ru/news/deklaracija-ob-oficialnom-nazvanii-jerzjanskogo-naroda

[9] http://uralistica.com/forum/topics/2161342:Topic:164887

[10] http://www.kasparov.ru/material.php?id=4AC1DA19CCC4E

[11] https://www.sova-center.ru/misuse/news/persecution/2015/01/d31174/

[12] http://uralistica.com/m/group/discussion?id=2161342:Topic:185775

[13] https://stolica-s.su/archives/275452?

[14] https://www.interfax-russia.ru/volga/view/millenium-po-mordovski?

[15] https://www.idelreal.org/a/31215653.html

[16] https://www.idelreal.org/a/interview-erzya-in-ukraine/29058589.html

[17] http://uralistica.com/m/blogpost?id=2161342%3ABlogPost%3A225831

[18] https://www.youtube.com/watch?v=H-jCk1PLk7U

Читать еще о репрессиях против национальной эрзянской интеллигенции в СССР:

Тязин Е. Н. Проблемы укрепления законности в СССР и деятельность специальных судебных коллегий краевых, областных судов и верховных судов автономных республик в 1937–1938 годах (на материалах Мордовской АССР) // Социально-политические науки. 2012. № 1.

Крисанова Н. А. Идеологическая борьба и репрессии против вузовской интеллигенции 1930-х годов в Мордовии // Вестник Саратовского государственного социально-экономического университета. 2009. № 3.

Видяева А. В. Политические репрессии 1930-х гг. против писателей Мордовии // Молодой ученый. 2011. № 12 (35). Т. 1. С. 233–234. URL: https://moluch.ru/archive/35/3994 (дата обращения: 15.05.2022).

Мартышкин В. Н. Реабилитирован посмертно (личный и профессиональный подвиг выдающегося мордовского правоведа Тимофея Васильева (к 116-летию со дня рождения)) // Юридическая наука. 2013. № 3.

Мемуары репрессированного И. Сибиряка. URL: http://www.zubova-poliana.narod.ru/repression-sibiryak1.htm

https://www.sakharov-center.ru/asfcd/auth/?t=unpublished&syn=312&;

https://shigurov.livejournal.com/367559.html?ysclid=l34ujdhhw

https://stolica-s.su/archives/43065

https://rusk.ru/st.php?idar=412971&;

https://www.svoboda.org/a/24190694.html

От кого:
Автор: Валдо
Кому:
Заголовок письма:
Кить истят эрзят ды мезе истямо Эрзянь Мастор

Колонизациянь этникань аспектось

Эрзя — Равонь суоми-угортнэнь эйстэ вейке раскесь. Эрзятнень атяст-сэрдяст тёжат иетнень перть эрильть те таркасонть, масторонстэнь эно, косо сынь эрильть ды эрить неень шкастокак, мерить Эрзянь Мастор. XI–XIII пингтнестэ Эрзянь Масторосо вачкавсь эсест кирдивиень кой. Цикань сёрмадовкстнэнь эйстэ содави эрзятнень Инязорост лемезэ — Пургаз. Пелеве ёндо Эрзянь Мастор пирязель Равонь ды Окань чиретнесэ, чилисемань ёндо — Окань чиресэнть, чивалгомань ёндо — Сурань чилисемань чиресэнть, лембе ёндо — куншкань ды алце Ёв леень чиресэ[1]. Куншкань пингстэ (Европань терминтнэнь тевс нолдамсто) эрзянь этникань седеесь ульнесь Алоошонь ёнкссонть, тосольть покш эрзянь ошт, невтемга, Арзамасонь ды Саровонь таркасост (сеть леметь эрзяньть). Ансяк цикань эцеманть пингстэ эрзятнень пельксэст оргодсь лембе ёнов, пельксэст истожавсь, пельксэст цикиявтозь. Секс течи эрзятнень этникань седеест ашти Мордовиянь Республиканть ёнкссо.

(арт.1) Эрзянь авась кодазь карксонть. Таркась: Борискина веле, Бугульмань буе, Самара ёнкс
криштявтыця Армас Отто Вяйсянен

Нусманя, секе марто редявикс иекс Эрзянь Масторонь туртов ваннови 1184 иесь. Ёвтави, те колонизациянть ушодоманзо шкась. 1184 иестэ ёвтавсь васня ёвтамось Владимир-Суздалень князень ломанензэ Эрзянь Масторов эцемась. Се шкасто сон “нолдазь лишметнень” эрзятнень лангс. Вана Владимиро-Суздалень князьчись, кона лангсо теевсь Московонь князьчись ды Россиясь, уставсь Эрзянь Масторонь колонизациянть. 1221 иестэ экспансиянь форпостокс путовсь Алоош. Эрзятнень, циятненькак улить кулят эрзянь ошонть ланга, конась ульнесь та-косо се ёнкссонть. Улиндеряволь алкукс, сонзэ каладыль Владимир-Суздалень князьчись.

1226 иестэ Лаврентьевань иесёрмалемасонть улить седе пензавтозь содамочитне: се шканя князень ломанензэ янгакшнозь Эрзянь Масторонть ды ламо эрзятнень саизь урекс. 1227 иестэ князь Юрий янгазь эрзятнень кудост ды телень кошост. 1228 иестэ Юрий ушмо марто совась Эрзянь Масторонтень, эрзятнень урекс кундамсто, ракшатнень, паксятнень ды апак сёпо ломантнень истожамсто. Седе мейле Юриянь ушмозо пельксэсь тусь вирев. Тосо эрзятне куродызь сонзэ ды тапась. 1229 иестэ инязор Пургаз ветилизь ушмонть Алоошов. Се шкане сон Кремленть эзь сае, ды эрзят пултазь кудотнень ошонть вакска ды Пежтеме Пазонь Чачтыцянть монастыренть. 1232 иестэ Владимирань князесь таго кучозь ломанензэ, конат пултазь эрзянь велетнень ды куловтозь эрзятнень (иесёрмалемась ёвты: “ламо мордватнень чавинек”).

Мон арсян, сетне факттнэ невтить: Эрзянь Масторонь нельгемась XII–XIII пингтнестэкак од эрицянь колониализмань логиканть ёнов моли. Колониализманть истя чачосонть пек ламо од эрицят арсить саемс юронь раськенть масторост, ды окойники сеть мастортнэнь лангсо теевить ламочикс ды снартнить нардамс юронь эрицятнень (лия пайманть вельде: истожамонть эйстэ нарьги ассимиляциянть эйс). Владимирань князьчись тейсь вана сень. Князьтне озасть эрямс масторсо, косо эрзятнень каня чавозь ломанензэ, каня нельгезь тиринь масторонть эйстэ урекс.

Колонизациянть сыця эскельксэзэ ушодсь, зярдо Казямо Иван кирдеманзо пингстэ Казань ошонть нельгемадо мейле Эрзянь Мастор оккупировазь Московонь царьчисэнть. Седе тов эрзят саизь пельксэнть ламо прякепедематнесэ цикань кирдивиенть каршо. Саемга, Разинень Степанонь прякепедеманть пингстэ вейке эрзянь ветицятнень эйстэ ульнесь мурзась Боляень Акай. Ломатнень ламоксчись, конат тюресть эсензэ ушмосонть царень кирдивиенть каршо, лиясто 15 тёжатненень сакшнось. Секе марто, 1670 иестэ Акай кундазель ды чавозель нилекс печкезь[2].

Чалгавксось, конась теевсь эрзятнень экономикань, ломанькуронь, пазонь кемемань эрямос. Прякепедемат

Эрзят марто ды оляксчинть велявтомс мелест марто тюреманть туртов истожильть велеть какшонек-сыренек (невтемакс, Мотызлей, Миевлей, Ошпире велеть) ды цикат масторост лангсо кармасть эрямо. Масторось Вознесенэнь ды Дивеевань районтнень таркасонть допрок чавокс теезь: ундоксонь эрзят арасть (улить аволь умок сазь эрзят). Секе башка, эрзятненень кардасть кунцемс ракшатнень, гизаень тевтнень теемс ды леднемапелень кирдемс. Цикань нельгицят саезь ды соказь эрзянь паксятнень, истяяк кармавтозь эрзятнень туемс вирев[3]. Лиясто ундоксонь раськенть каршо нельгезь мастортнесэ вачкавсть виемемат, эрзятне иляст велявто кудов.

Колонизациясь кандсь полавтнемат эрзянь ломанькуроненьгак. Эрзятнень этнографиянть классикесь В.Н. Майнов сёрмадсь: цикиявтомась снартнесь вийсэ максомс эрзятненень патриархалень ёнкстнэнь. Истя теевсь кудонь нарьгамось, конань нолдыть тевс “чумонь пандовксокс”. Эрзятне колонизациядо икеле, кода неяви, эзитькак сае пряс, кода те маштови. Цикань фольклордо башка, эрзянь фольклорсо истят сценат арасть. XIX пингенть песэ эрзят лемдекшнесть нарьгамонть тевс нолдамонть эсь кудораськенстэнь “цикань коекс”.

(арт.2) Эрзянь урьвакстомась пазидань вардамодо икеле. Таркась: Середневка веле (неень шкань Трифоновка веле), Бугурусланонь буе, Самара ёнкс
криштявтыця Армас Отто Вяйсянен

Колонизаторт снартнесть эрзятнень христианизировамскак. 1629 иестэ пансизь ды кардызь Раськень Озксонть. Керязьть пежтеме виреть, косо эрзят тейсть озномаст, ды чувтотнестэ вачкавсть ортодоксонь храмт — практикась, конась ульнесь таркань экологияс эцемакскак.

Секе шканя эрзятне снартнесть молемс чекавтомантень каршо ды кепедсть пряст. Вейке эйстэст, Терюшань прякепедемась, ушодсь 1743 иестэ, зярдо епископось эрзянь пазонь кемема марто тюреманть туртов пултазь эрзянь калмазыренть. Седе мейле эрзят урандесть епископонть лангс ды эль эзизь чаво. Сестэ кирдивийтне ушодсть се прякепедеманть тапамо. Казямочись, кона марто сынь тапазь прякепедеманть (невтемакс, кувать ды виевстэ дуцясть пекиязь аванть локшосо), седе пек кежиявтозь эрзятнень, ды прякепедемась кирвастсь од вийсэ. Сон прядовсь прякепедицятнень тапамосо царень ушмотне марто тортингесэнть. Эрзятне ёмавтозь 74 ломанть чавозекс[4].

Россиянь империясонть Виленонь ёнкссо вейкесь цикиявтыцятнень эйстэ весть ёвтась: “Мень эзь прядокшно цикань штык, сень прядсызь цикань школа ды цикань поп”. Мон арсян, те ёвтамось видесь Россиянь ламо колонязь раськетненень. Од эрицятнень колониализмаст ёнавкстнэнь коряс — полавтомс ды нардамс ундоксонь эрицятнень — “цикань штык” чавсь эли кравтозь мастортнэнь эйстэ эрзятнень, “цикань школа” ды “цикань поп” снартнезь цикиявтоманть вельде, культурань, келень, пазонь кемемань идентичист вельде эрзятнень ассимилировамс.

СССР пингетнеде ды “мордва” экзоэтнонимде

Цикиявтомань политикась эзь лотксеве XX пингстэкак. СССР, мельтопавттнэнь (праватнэнь) вейкетьксчинть лангс ды колониализмань политиканть ушонь сялдоманть лангс апак ванно, алкукс седе тов теизь колониалень политиканть аволь цикань ошэрицятнень (граждантнэнь) коряс ды онкстявтозь мастортнэнь коряс, седе башка эзь шнакшно раськень пря чарькодевтема. Невтемакс, документтнэсэ ды ломань сёрмадстоматнесэ тевс эзь нолдаво “эрзя” этнониманть, ансяк “мордва” экзоэтнониманть.

Эряви манейгавтомс: мордва — те аволь ансяк экзоэтнонимась, конань тевс нолдыть цикань кельсэнть. Те кавто лия раськетнень — эрзятнень ды мокшотнень ве лемсэ вейсэндявксось. Россиянь империясь, СССР, РФ снартнесть вийсэ вейсэндямс ве раськес кавто раськетнень лия келест, культураст ды историяст марто. Лиясто, башка историянь коряс, те прави пейдевтицякс. Невтемакс, XIII пингстэ эрзят ды мокшот тюрекшнесть вейке омбоценть каршо, ды сеть теематнень сёрмалемась россиянь вановкссонть вейсэндязь “мордва” марто неяви теке мемесь Шанжав-ломань марто.

(арт.3). Эрзянь ава Проска коень-кирдань оршамопельтнесэ. Таркась: Шентала веле, Бугульмань буе, Самара ёнкс
криштявтыця Армас Отто Вяйсянен
1914

Лия башка эрзянь идентичинь истожамонть снартнеманть невтемась: эрзянь валморотнень леметь “эрзя” ды “Эрзянь Мастор”, конатнень тевс нолдыть поладыцят, ютавтовольть цикакс кода “мордва” ды “Мордовский край”. Истя эрзят ды мокшот эсь пряст “мордвакс” алкукс зярдояк эзизь лемдекшне, видьстэ те ёвтави весе вийсэ цикиявтомадо икелень шканть ланга. Натой пек цикиязь куротнесэ, косо ломанть алкукс тевс нолдыть “мордва” валонть, сынь явовтыть мокшотнень ды эрзятнень, ды эрзятнень ули чарькодемаст: вана сынь мокшот, сынь лият, ды сынь аштить эйстенек башка (этникань идентичинть чарькодеманть паро смустьсэнть). Весть монень савкшнось марямс малав истя кортамонть цика ды эрзя ютксо:

— Сынь мордовкат, мон аздан, кода муемс ве кель мартост!

— Тонськак мордвинось!

— Истя, ансяк сынь мокшот!

Седе башка, пря чарькодевтема марто тюрязь, зярдо Мордвань АССР теемстэ эрзятнень ды мокшотнень пельксэст путсть вий “алонь ёндо” республикань теемасонть, те сялдоволь ды кардаволь “Мордовиянь автономистань бюронь тевсэ”. Шкадо мейле фабрикасть “Мордовонь блок тевеськак”, конань коряс 1938 иень панжиковонь 23-24-це чистэ леднезельть 70 ломанть эрзянь ды мокшонь интеллигенциянть, культурань ды нациянь теицятнень ютксто. Леднезь ютксо се тевенть коряс — кельсодыцясь Рябовонь Анатолий, кона теезь литературань норманть эрзянь келенть туртов (сонзэ тонавтницянзокак репрессировазельтькак), Тимофей Васильев юристэсь, “Эрзянь коммуна” кулялопань витницясь К.Д. Звездин, “Сятко” журналонть витницясь Д.И.Гребенцов. Эрзянь культуранть ды кирдивиень коень вельмеманть ветиця теицянзокак репрессировазельть. Истят этникань ёнов молиця тевтне националистэнь организациятнень шкинеманть коряс валгстовсть верьксстэнть лия Равонь республикатнескак[5].

Националень интеллигенциянть истожамодо башка, урандесть эрзянь кельскак. Невтемакс, эрзянь лингвисттнэнь пельде максозь терминтнэнь таркас, конатнэнь улить кезэрэнь юронзо, норматнень коряс вийсэ максозельть ламо саень валт цикань келенть эйстэ. Истя, вейке Мордовиянь АССР ЦИК Президиуманть мельспутомасонзо кармавтозь полавтнемс “тешкс” терминэнть “знак” терминэнть таркас, “калгодо тешкс” — “твёрдый знак” таркас, “пшкадема” — “обращения” таркас. Эрзянь кельсодыцятнень важодемась эно антисоветэнекс мерекшнезь[6].

СССР-со историкатнень эрявкшнось кикстамс цикань раськенть пельксэнзэ прогрессивноекс, конась канды валдо “перьгедезь” раськетненень. Невтемакс, советэнь шканть эйстэ Россиянь этнографиянь музеень экспозициясонть, конась алтазь Равонь ды Уралонь раськетнень, конатнень ютксо улить эрзяткак, лазынесэнть ёвтыть прогрессивонь, ветиця цикань раськенть пельксэденть лия этностнэнь историясонть.

Неень шкань Россиясонть эрзятнень эрямост

Цикань раськенть ветиця пельксэденть тезисось лиякстомсь, ансяк нама эзь ёма. Течи цикатнэ чарькодевить раськекс, коната машты тевс нолдамо лия раськетнень эсь мелензэ коряс. Истя ёндо варштыть Мордовия Республиканть кирдивиензэ, невтемакс, ютазь прявтозо Николай Меркушкин. “Ули цикань раськесь, кона течи доминицясь те масторсонть, овсе масторонь теицясь” — сон ёвтась[7]. Истя юткоёжот раськетнесэ кастовить кирдивиень вийсэ, коень нолдамонь вельдеяк. 2020 иестэ конституцияв витневкстнэнь путоманть пингстэ келей публикань туртов те, кода неяви, кадовсь пек апак редя ды покш смусь а кандыцякс, ансяк ундоксонь раськеть невтицяст ды активиксттнэ седе пек ледстнить парсте: цикань келенть лемдизь “масторонь теиця раськенть” келекс Россиянь Лувонь койсэ.

(арт. 4) Эрзянь од авань морамокужось. Таркась: Шентала веле, Бугульмань буе, Самара ёнкс
криштявтыця Армас Отто Вяйсянен

1914

Те юткоёжось ломатнененьгак пачкодсь, секс сынь виздить эсь пряст, ацикаксчидест. Лиясто эрзятне арсить, келя эрзянь кель ульцянь кортамотнесэ а меревиксэсь. Эрзят, конатнень кедьстэ нельгесть эсь прянть мельванноманть, кортыть цикакс, тонавтнить эйкакштнэнь ансяк цикакс ды снартнить кандомо ваксарокс цикаксчинть. Сынь аравтыть эсь пряст нетнень каршо, конат колониалень иерархиянть коряс улить цикань идеалонть эйстэ седе васоло ды невтить абунгавтовикс активчи расизмасонть. Ёвтыть, келя “Машанок мирдезэ — аволь цикась!” ды пансесызь кудостост.

Секе шканя, зярдо эрзянь цёра цикань кель тонавкссонть тейсы ильведевкстнэнь, конат кортыцят коень коряс теить (сон цикакс кортыцясь, эрзянь келенть эно чачтыцянзо тензэ эзизь максо), цикань тонавтницясь яволявты: те тееви, секс мекс сон “мордвин”. Ды нококсни: эрзят авольть пек превейть ды а маштыть сакшномс ломанекс. Се ёвтамось сень ланга, мезень сёрмалесь Хоми Баба эсензэ мимикриянь концепциясонзо: колонизаторось снартни теемс колонизовазень эсензэ кондямокс, ансяк аволь педе пес, “ашо” ды “аволь ашо” юткова пирявксонть кирдезь. Се шкасто, зярдо Россиясонть расизмань ёнксонстэнь эряви башка ванкшномась, муеви аналогиясь “цика” ды “аволь цика” марто.

Секе шканя моли седе тов раськень эсь прянь чарькодеманть тапамонь политика. 1992 иестэ I Весероссиянь мордовонь раськенть промкссонть, конанть ветямонзо инициировазь эрзянь курось “Масторава”, эрзятне вешнесть “эрзя” эсь лем тевс нолдамодонть, ансяк се вешнемась эзь топавтово. Седе башка, 1995 иестэ I эрзянь раськенть Инекужосонть, конань теезь Малов Александр, Девяткин Валентин ды Маризь Кемаль, саезь эрзянь раськенть алкуксонь лемензэ коряс Мельяволявтома, конань эйсэ эрзятне пшкалесть кирдивиентень, явозь мелест саевемс масторлангонь раськетнень куросо эсь лемест марто[8]. Те пшкалеманть коряскак кодаяк мель эзь яво. 2012 иестэ Боляень Сыресь ды Эрюш Вежай пикетезь VI суоми-угоронь весемасторонь инекужонть. Пикетэнь тувталозо — башка эрзянь делегациянть Инекужов анолдамось россиянь кирдивиенть пельде лепштямонзо кувалт[9].

Эрзянь раськень айгема РФ-со пансеви. Невтемакс, 2007 иестэ Мордовиянь Республикань прокуратурась уставизь процессонть А.П. Рябовонь лемсэ эрзянь келень идема Лезэпарго аорев эрзянь кулялопанзо “Эрзянь Мастор” каршо. Кулялопанть лангсо каявкшнось чумось экстремизмасо, раськеютконь явомань кирвастнемасонть. Сялдомат-пансемат прядовсть седе мейле, зярдо Верце суд яла теке эзь муе материалтнесэнзэ мезеяк экстремистань. Се шканя кулялопа ванстовозь, ансяк 2009-це иестэ таштамковонь 25-це чистэ, зярдо эрзятнень пельде кочказь инязор Кшуманцянь Пиргуж суоми-угоронь раськетнень IV Промкссонть сравтозь “Эрзянь Мастор” кулялопанть, милициясь снартнесь мешамо. Инязорось чарькодевтсь, кулялопась официаленьстэ регистразь ды эйсэнзэ мезеяк кардазь арась. Секе чистэ инцидентась маштсь. Ансяк таштамковонь 26-це чистэ, зярдо Кшуманцянь Пиргуж таго сравтозь кулялопанть, сонзэ кундызь. Инязоронть эзить нолдакшно промксонть прядовомадонзо икеле, натой зярдо сонзэ марто лиссь гипертоникань криз. Криз шумбрачинть пек серьстяви, секс бути се лисеви, эряви госпитализировамс. Милициясь нолдазь лецицятнень тензэ, ансяк госпитализировамс эзть мере[10].

2015 иестэ таго ульнесь варчавксось пекстамс “Эрзянь Мастор” кулялопанть, се шкасто Роскомнадзоронть пельде. Сестэ РФ-онь Верце суд чиремтезь се вешеманть[11]. Ансяк 2020 иестэ эрзянь келень идемань Лезэпаргонть эйстэ пансевсть Нуянь Видяз, конась регистрировазь 1995 иестэ Лезэпаргонть ды конась ульнесь “Эрзянь Мастор”[12] кулялопанть прявт витницякс, ды Кшуманцянь Пиргуж. Лезэпаргось одс лемдезь Мордовиянь республикань ломанькуронь эрзянь келень ванстомань ды кастомань лезэпаргокс. Тувталокс аштесь: од лезэпаргонь азоронзо мелест коряс икелень лемесь ульнесь “агрессивань”[13].

Кирдивиенть ало Мордовиянь Республикань прессасонть ветяви активонь пропагандистань кампаниясь эрзянь раське айгемань теицятнень каршо, саемга, Кшуманцянь Пиргужонь каршо ды кочказь 2019 иестэ од инязоронть Боляень Сыресень каршо. Мусколиця мельполадкстнэ истят материалтнесэ токавтыть эрзянь теицятненьгак.

Седе башка, Россиянь кирдивийтне аволь весть снартнесть коламс вельмевтезь Раськень Озкс, невтемакс, сынь кундазь Кшуманцянь Пиргужонть, Озксонть Вельмевтеманть мелень кастыцянть, вейкенть сонзэ теицянзо ютксто, снартнезь полавтнемс эрзянь озксонть цикань кельсэ моротнекс ды поп-музыкакс.

Эрзянь келенть путоманзо аволь седе парсте. ООН классификациянть коряс эрзянь кель — ёмавтомань ало кель, эйкакштнэ сонзэ тиринекс а тонавтнить. Эрзянь келенть тевс нолдамонь сферась пек вишкалгавтозь. Мордовия Республикань эйкакшонь кужотнесэ кортамось эйкакштнэнь марто тееви цикакс, эрзянь келенть ланга кортыть ансяк 3–4% эйкакштнестэ. Республикань буеньтешксэнть томбале сеяк мик арась. Школатнесэ аволь ансяк кармавтозь тонавтнеманть кис шкась арась, лиясто кинигаткак арасть. Од эрзянь кинигатнень муемась, седеяк пек лепштязь, лиясто лиси мельстуиця прява печтемась: натой Саран ошонь кинигань микшнемакудосонть, косо микшневить нолдавкстнэ эрзянь кельсэ, лиясто а муевить классикань поладомат ды валксстнэ. Вейкине эйкакшонь журналось “Чилисема” ловныцятнень ламоксчист нурькалгадоманть эйстэ ашти пекстамо серстямонть ало. Цикань кель доминирави натой истя пелькссэнть, кода эрзянь велеть лемест. Ламо эйстэст кандыть цикань леметь. Полавтомгаст тозонь эрицятненень эряви путомс пек ламо вий. Истя эрзянь леметь пельксэст аламонь-аламонь туить.

(илл. 5) Эрзянская женщина, молодуха (Танька, Ta'nka) в воскресных одеждах. Место: Середневка (ныне Трифоновка), Бугурусланский район, Самарская область

фотограф Армас Отто Вяйсянен

1914

Оштё вейке россиянь колониализмань паймась - ундоксонь раськеть историяст синтремась эли чатьмонемась. Саран ошонь куншкасонзо ашти ошкужось, кона алтазь “мордвань ды цикань раськетнень вейсэндямост тёжа иетнень”, конань ало чарькодеви вейсэндямось славянтнэнь марто (цикатнень атяст-сэрдяст марто) ды икелепелень Россиянь кирдивиенть марто[14]. Те секень марто: кавксосядт иетнеде икеле эрзятнень куловтозь ды урекс тейнесь секе виесь.

Оштё вейке невтемась: куш XVIII пингстэ Саровонь пустынень теицясь Иоанн ёвтась: паряк, эрзянь ошось аштесь се таркасонть, кияк россиянь содыдейтнень эйстэ седе эзь мерекшне. Бульчум, мелест коряс, эрзянь культурась ульнесь алойшть мельгаст. Ансяк 1990-це иетнесэ эрзянь ошонть улеманзо кемекставсь, ансяк стакасто ды аволь сеске.

Весе сеть россиянь колониализмань политикаст ветить эрзятнень ламоксчист куроконь вишкалгадомантень. 2002 иеде 2010 иес эрзятнень ды мокшотнень ламоксчист вишкалгадсь малав 100 тёжат ломантнес. Боляень Сыресень мелензэ коряс, Россиясь теи ундоксонь раськетнень этноциданть. Седе сон ёвтась эсензэ кортамосонзо РВО-сонть (Раськень Вейсэндязь Организациясонть). Те  кортамось кармась васенцекс РВО-сонть эрзянь кельсэ. Улевиксчинть максозь Украинань Делегациясь[15].

Солидариксчись Украинань марто

Боляень Сыресь эри Украинасонть. Раськень идентичинть актуализациянтень тулкадемакс тензэ кармась Черноволонь Вячеславонь марто вастовомась, конась кортась мартонзо, зярдо сон 90-це иетнесэ ванстыль “националисттнэнь эйстэ” плакатонть “Володимире Іллічу, прости нас!” Ленинонь кеврунгонзо вакссо. Боляень Сыресентень вечкевсь: Черноволонь Вячеслав, конась пек кувать пекстазель Мордовиянь лагерьтнесэ, содась эрзятнеде Сыресьте седе ламо. Украинав Россиянь весе вийсэ эцемадо ды Киевень лангс урандемадо мейле инязор сась Территориалень ванстомантень. Лия эсь мелест коряс Украинань ванстыця эрзятнеде Инязорось корты: пек аламо, эрзянь националень вейсэндямонть теемга[16]. Ансяк ёвтави секе марто, пельксэсь раськень айгемасто ашти Россиянь агрессиянть каршо. 2014 иестэ Инекужонь эрзянь раськень топавтыця комитетэсь пшкадсь эрзятнень тортингев кучомань амеремадонть[17]. 2022 иестэ эно инязорось Киевсто пшкадсь эрзятненень туемс ульцяв ды лоткавтомс тортингенть[18].

[1] Зеленеев Ю. А., Зеленцова О. В. Средневековая мордва по археологическим данным // Поволжская археология. 2012. № 1.

[2] Абрамов В. К. Акай Боляев и Крестьянская война 1670–1671 гг. в Мордовском крае // Финно-угорский мир. 2020. № 2.

[3] Сычев А. А. Культ леса в системе экологических верований мордвы // Финно-угорский мир. 2015. № 4 (25).

[4] Титов А. А. Терюшевский бунт // Русское обозрение. 1893. № 8–10.

[5] Тязин Е. Н. Т. В. Васильев. Незабытый сын мордовского народа // Социально-политические науки. 2012. № 3.

Мартышкин В. Н. Васильев Тимофей Васильевич — патриот, правовед (о первом юристе-международнике в Великобритании) // Евразийская адвокатура. 2013. № 1 (2).

[6] Мосин М. В., Шеянова Т. М. Из истории создания терминологии в мордовских языках // Регионология . 2012. № 4 (81).

[7] https://er.ru/activity/news/v-mordovii-nachinaetsya-prazdnovanie-1000-letiya-edineniya-s-narodami-rossii?

[8] http://erzan.ru/news/deklaracija-ob-oficialnom-nazvanii-jerzjanskogo-naroda

[9] http://uralistica.com/forum/topics/2161342:Topic:164887

[10] http://www.kasparov.ru/material.php?id=4AC1DA19CCC4E

[11] https://www.sova-center.ru/misuse/news/persecution/2015/01/d31174/

[12] http://uralistica.com/m/group/discussion?id=2161342:Topic:185775

[13] https://stolica-s.su/archives/275452?

[14] https://www.interfax-russia.ru/volga/view/millenium-po-mordovski?

[15] https://www.idelreal.org/a/31215653.html

[16] https://www.idelreal.org/a/interview-erzya-in-ukraine/29058589.html

[17] http://uralistica.com/m/blogpost?id=2161342%3ABlogPost%3A225831

[18] https://www.youtube.com/watch?v=H-jCk1PLk7U

Читать еще о репрессиях против национальной эрзянской интеллигенции в СССР:

Тязин Е. Н. Проблемы укрепления законности в СССР и деятельность специальных судебных коллегий краевых, областных судов и верховных судов автономных республик в 1937–1938 годах (на материалах Мордовской АССР) // Социально-политические науки. 2012. № 1.

Крисанова Н. А. Идеологическая борьба и репрессии против вузовской интеллигенции 1930-х годов в Мордовии // Вестник Саратовского государственного социально-экономического университета. 2009. № 3.

Видяева А. В. Политические репрессии 1930-х гг. против писателей Мордовии // Молодой ученый. 2011. № 12 (35). Т. 1. С. 233–234. URL: https://moluch.ru/archive/35/3994 (дата обращения: 15.05.2022).

Мартышкин В. Н. Реабилитирован посмертно (личный и профессиональный подвиг выдающегося мордовского правоведа Тимофея Васильева (к 116-летию со дня рождения)) // Юридическая наука. 2013. № 3.

Мемуары репрессированного И. Сибиряка. URL: http://www.zubova-poliana.narod.ru/repression-sibiryak1.htm

https://www.sakharov-center.ru/asfcd/auth/?t=unpublished&syn=312&;

https://shigurov.livejournal.com/367559.html?ysclid=l34ujdhhw

https://stolica-s.su/archives/43065

https://rusk.ru/st.php?idar=412971&;

https://www.svoboda.org/a/24190694.html

Мнение редакции может не совпадать с точкой зрения авторов и героев публикуемых материалов
Другие посты рубрики
«
Истории
»